გასული წელი ტურისტების ზრდის თვალსაზრისით საკმაოდ წარმატებული აღმოჩნდა. 2016 წელს საქართველოს 6 350 ათასი ვიზიტორი ესტუმრა, მათი 43% კი ტურისტი იყო (ტურისტი არის ვიზიტორი, რომელიც ქვეყანაში 24 საათზე მეტი დროით რჩება). 2016-2017 წლების ზამთრის ტურისტული სეზონის (დეკემბერი-მარტი) დასრულების შემდეგ კი, ჩვენ დავინტერესდით, რამდენი ვიზიტორი ესტუმრა საქართველოს ამ პერიოდში. შინაგან საქმეთა სამინისტროს ინფორმაციით, 2016 წლის დეკემბრიდან 2017 წლის მარტის ჩათვლით საქართველოში 1 752 ათასი საერთაშორისო ვიზიტორი შემოვიდა, რაც გასული წლის ანალოგიურ მაჩვენებელს 9%-ით აღემატება.   ცხრილი 1: 2011-2017 წლებში, დეკემბერ-მარტის პერიოდში, ქვეყანაში შემოსული ვიზიტორების რაოდენობა

წლები	დეკემბერი	იანვარი	თებერვალი	მარტი	სულ	ზრდა
2011-2012	282 420	226 964	185 113	265 127	959 624	-
2012-2013	373 294	280 023	291 659	363 676	1 308 652	36%
2013-2014	392 628	320 005	295 434	394 884	1 402 951	7%
2014-2015	435 446	309 753	293 152	386 257	1 424 608	1.5%
2015-2016	465 985	323 159	360 402	451 737	1 601 283	12%
2016-2017	486 141	387 070	368 010	511 045	1 752 266	9%

  როგორც ცხრილიდან ჩანს, 2011-2012 წლების ზამთრის ტურისტული სეზონიდან დღემდე, ქვეყანაში ამ პერიოდში შემოსული საერთაშორისო ვიზიტორების რაოდენობა ყოველწლიურად იზრდება. ყველაზე მაღალი ზრდა 2012-2013 წლების შესაბამის პერიოდში დაფიქსირდა. რაც შეეხება ქვეყანაში შემოსული ტურისტების რაოდენობას, ბოლო ოთხი წლის მაჩვენებლების მიხედვით, ზამთრის ტურისტულ სეზონზე ქვეყანაში შემოსული ტურისტების რაოდენობაც ძირითადად მზარდია.   ცხრილი 2: 2013-2017 წლებში, დეკემბერ-მარტის პერიოდში, ქვეყანაში შემოსული ტურისტების რაოდენობა

წლები	დეკემბერი	იანვარი	თებერვალი	მარტი	სულ	ზრდა
2013-2014	145 642	122 996	108 685	144 934	522 257	-
2014-2015	145 946	111 908	101 046	136 389	495 289	-5%
2015-2016	155 048	116 369	120 215	170 835	562 467	14%
2016-2017	177 982	154 083	139 918	219 642	691 625	23%

  ჩვენ დავინტერესდით, რამდენად დატვირთული იყო უშუალოდ ზამთრის კურორტები 2016-2017 წლების დეკემბერ-თებერვლის სეზონზე (მარტის სტატისტიკა ჯერჯერობით ხელმისაწვდომი არ არის). ვინაიდან სხვადასხვა კურორტზე ჩასული დამსვენებლების დაზუსტებული მონაცემები არ არსებობს, მიახლოებითი სურათის წარმოსაჩენად ჩვენ "მთის კურორტების კომპანიის" მიერ მოწოდებული ინფორმაცია გამოვიყენეთ. აღნიშნული კომპანია (ელექტრონული ბაზის საშუალებით - SKIDATA) საბაგიროებზე გაყიდული ბილეთების რაოდენობით ვიზიტორთა დაახლოებით რაოდენობას ადგენს.   ცხრილი 3: საბაგიროებზე ვიზიტორების საშუალო რაოდენობა 2016-2017 წლების სეზონზე (დეკემბერი-თებერვალი)

წელი	2016 დეკემბერი	2017 იანვარი	2017 თებერვალი	ჯამი
თეთნულდი	513	4 001	3 751	8 265
ჰაწვალი	1 221	3 059	3 582	7 862
გოდერძი	1 533	2 915	1 013	5 461
გუდაური	68 805	103 612	97 782	270 199
ბაკურიანი	22 541	93 739	60 335	176 615

  2016-2017 წლების ზამთრის სეზონზე კურორტ თეთნულდის საბაგიროს 8 265 ვიზიტორი ეწვია, დაახლოებით იგივე რაოდენობა დაფიქსირდა ჰაწვალის საბაგირო ქსელზე. ამ მონაცემების მიხედვით, ყველაზე მცირე რაოდენობის ვიზიტორი გოდერძის საბაგიროებზე დაფიქსირდა, ყველაზე დიდი რაოდენობით კი, გუდაურის საბაგიროებზე - 270 199. ხოლო, ბაკურიანის საბაგიროებით 176 615-მა ტურისტმა ისარგებლა. რაც შეეხება წლევანდელი სეზონის მონაცემების გასული წლის ანალოგიურ მაჩვენებლებთან შედარებას, მსგავსი შედარების გაკეთება მხოლოდ გუდაურის მაგალითზე შეგვიძლია. როგორც აღვნიშნეთ, 2016-2017 წლების დეკემბერ-თებერვლის პერიოდში გუდაურის საბაგიროებზე ჯამში 270 199 ვიზიტი დაფიქსირდა, 2015-2016 წლების დეკემბერ-მარტში ეს მაჩვენებელი 201 821 იყო, 2014-2015 წლების ზამთრის სეზონზე კი - 171 983. მიუხედავად იმისა, რომ 2017 წლის მარტში გუდაურის საბაგიროებზე დაფიქსირებული ვიზიტორების რაოდენობა ჯერ ცნობილი არაა, წლევანდელი სეზონის სამ თვეში დაფიქსირებული მაჩვენებლები წინა წლების სრულ მონაცემებს უკვე აღემატება, რაც იმის ვარაუდის საფუძველს იძლევა, რომ ქართული ზამთრის კურორტების პოპულარობა იზრდება.