სოციალურ ქსელში ვრცელდება ყალბი ინფორმაცია, თითქოს ლიმონის წვენი კორონავირუსისგან თავდაცვის უმარტივესი ხერხია.

საინფორმაციო სააგენტო „თვალსაზრისი“ აქვეყნებს სტატიას, სათაურით, „კოვიდი აღარ დაგემართებათ, თუ 3 დღეში ერთხელ ამ უმარტივეს მეთოდს გამოიყენებთ“. სტატია რუსულენოვან ვიდეოს ეფუძნება, რომლის თანახმადაც, კორონავირუსი სუსტი ვირუსია. მისი დამარცხება უმარტივესი მეთოდით, პირისა და ცხვირის ღრუს ლიმონის წვენით დამუშავებით, შეიძლება.

პანდემიის დასაწყისშივე, საერთაშორისო მასშტაბით, კორონავირუსის სამკურნალო არაერთი ცრუ „წამალი“ გავრცელდა. მათ შორისაა, ლიმონიც. „ჯანდაცვის მსოფლიო ორგანიზაციის“ თანახმად, საკმარისი ოდენობის ხილისა და ბოსტნეულის მიღება რეკომენდებულია, რადგან ეს ჯანსაღი კვების ნაწილია. თუმცა, მათივე თქმით, არ არსებობს მეცნიერული მტკიცებულება, რომელიც დაადასტურებს, რომ ლიმონი კორონავირუსისგან გვიცავს.

ანალოგიური პოზიცია აქვს ჯონ ჰოპკინსის უნივერსიტეტის ჯანმრთელობის უსაფრთხოების ცენტრის წევრს კრუტიკა კუპალაის: არ არსებობს მონაცემები, რომელიც აჩვენებს, რომ ლიმონის წვენს, ცხელ ჩაის ან რაიმე მსგავსს ვირუსის მოკვლა შეუძლია. 

ლიმონის სხვადასხვა მეთოდით კორონავირუსის წინააღმდეგ გამოყენების შესახებ გავრცელებულ მითებს ფაქტების გადამოწმების ონლაინ პლათფორმამ (Factly), ვიდეო მიუძღვნა. გავრცელებული ინფორმაციის სიყალბის შესახებ ფაქტების გადამოწმების საერთაშორისო პლათფორმებმა (FactChechk.org, Politfact.com) და საინფორმაციო სააგენტოებმაც (Euronews.com, BBC.com) დაწერეს.

ამ ყველაფრის გათვალისწინებით, მტკიცება, რომ ლიმონი კორონავირუსით ინფიცირებისგან გვიცავს, მცდარი და ფაქტობრივ საფუძველს მოკლებულია.

COVID –19-ით ინფიცირებისგან თავის დაცვა შემდეგი წესების დაცვით არის შესაძლებელი:

• ატარეთ პირბადე;

• ხშირად დაიბანეთ ხელები საპნითა და წყლით, ან დაიმუშავეთ სპირტის შემცველი ხსნარით;

• მოერიდეთ თვალზე, პირზე და ცხვირზე დაუბანელი ხელის შეხებას;

• დაიცავით არანაკლებ ერთმეტრიანი ფიზიკური დისტანცია თქვენსა და გარშემომყოფებს შორის;

• მოერიდეთ ხალხმრავალ შეკრებებს.

პანდემიის დასაწყისიდანვე კორონავირუსთან დაკავშირებით არაერთი დეზინფორმაცია გავრცელდა, რაზეც „ფაქტ-მეტრი“ აქამდეც წერდა.