Tvm.ge-ის „ჩვენ შესახებ“ სექციაში ვკითხულობთ, რომ ის ინტერნეტ ბაზარზე 2013 წელს გამოჩნდა (https://whois.domaintools.com-ის მიხედვით, ვებგვერდი 2015 წელსაა შექმნილი) და „აშუქებს საქართველოსა და მსოფლიოში მიმდინარე მოვლენებს როგორც ტექსტურ, ასევე ვიდეო ფორმატში“. ვებგვერდს არაერთხელ გამოუქვეყნებია ანტიდასავლური და დეზინფორმაციული სახის მასალები ისეთი პრორუსული გამოცემებიდან, როგორებიცაა „საქართველო და მსოფლიო“, „ნიუსფრონტი“, „საქინფორმი“. მაგალითად, tvm.ge-მ გამოაქვეყნა „ნიუსფრონტის“ სტატია, სადაც მოცემული იყო მტკიცება, რომ კორონავირუსი ჩინეთში არ წარმოშობილა და ალტერნატიული წარმოშობის ადგილად ლუგარის ლაბორატორიაზე მიანიშნებდა. ლუგარის ლაბორატორიასთან დაკავშირებით შეთქმულების თეორიებსა და ყალბ ამბებს რუსულ მედიაზე დაყრდნობითაც ავრცელებდა და მის დახურვას ითხოვდა. ასევე, tvm.ge აშშ-ის საპრეზიდენტო არჩევნების გაყალბების შესახებაც ავრცელებდა ყალბ ამბებს. გარდა პრორუსული და ანტიდასავლური გამოცემების კოპირებისა, tvm.ge კორონავირუსთან, კორონავირუსის საწინააღმდეგო ვაქცინებთან და მსგავს საკითხებზე უამრავ ყალბ ამბავსა და შეთქმულების თეორიას ავრცელებს, მათ შორის, პირდაპირ უარყოფდა კორონავირუსის არსებობას.

tvm.ge-ის გავრცელებული დეზინფორმაცია/პროპაგანდის შესახებ შეგიძლიათ გაეცნოთ საქართველოს რეფორმების ასოციაციის (GRASS) ანგარიშებში - „დეზინფომეტრი“.