დეზინფორმაცია: გერმანიაში აცრის შედეგად 15 წლის გოგო დაიღუპა

ვერდიქტი: ყალბი ამბავი

2021 წლის 2 ივნისს, ხათუნა საგინაშვილმა Facebook-მომხმარებელ Tea Jojua-ს ინფორმაციაზე დაყრდნობით პოსტი გამოაქვეყნა. პოსტის თანახმად, „გერმანიაში დაიწყეს ბავშვების აცრა და დღეს 15 წლის გოგო დაიღუპა ვაქცინაციის შედეგად“.

სინამდვილეში გავრცელებული ინფორმაცია გერმანიაში ვაქცინაციის შედეგად ბავშვის გარდაცვალების შესახებ, მცდარია. მიუხედავად იმისა, რომ გერმანიაში ვაქცინაციის პროცესში ბავშვების ჩართვა ნამდვილად იგეგმება, ვაქცინაციის პროცესი ჯერჯერობით დაწყებული არ არის.

28 მაისს ევროპის მედიკამენტების სააგენტომ (EMA) 12-დან 15 წლამდე ასაკობრივ ჯგუფებში Pfizer/BioNTech-ის ვაქცინის გამოყენების ავტორიზაცია გასცა. ავტორიზაციის მიუხედავად, ევროკავშირის წევრი სახელმწიფოები ამ საკითხთან დაკავშირებით გადაწყვეტილებებს ინდივიდუალურად მიიღებენ. უშუალოდ გერმანიის მთავრობამ ამ გადაწყვეტილებას მწვანე შუქი გასულ კვირასვე აუნთო, მიუხედავად იმისა, რომ გერმანიის ვაქცინაციის კომისიას (Stiko) შესაბამისი რეკომენდაცია არ გაუცია. კომისიის აზრით, კვლევები მცირე ჯგუფებში ჩატარდა და გადაწყვეტილების მისაღებად არსებული ინფორმაცია საკმარისი არ არის. Stiko-ს პრეზიდენტმა, თომას მერტენსმა განაცხადა, რომ კომისია საკუთარ პოზიციას მინიმუმ ორი კვირაში განაცხადებს, თუმცა არსებობს ფართო მოლოდინი, რომ ის საყოველთაო რეკომენდაციას არ გამოაქვეყნებს, არამედ რეკომენდაციას ვაქცინაციის შესახებ განსაკუთრებით მოწყვლად ბავშვებში, მათ შორის ასთმით დაავადებულებში, გასცემს.

27 მაისს, გერმანიის კანცლერმა ანგელა მერკელმა განაცხადა, რომ 7 ივნისიდან ვაქცინაციაზე პრიორიტეტიზაციის მოხსნის შემდეგ, ვაქცინაზე რეგისტრაციის გავლა 12 წელზე უფროსი ასაკის ბავშვებსა და ახალგაზრდებსაც შეეძლებათ. მისი თქმით, ყველა მოქალაქეს აგვისტოს ბოლოსთვის შეეძლება, რომ სულ მცირე ვაქცინის ერთი დოზით მაინც იყოს აცრილი. ამასთანავე, მერკელმა ხაზი გაუსვა, რომ ბავშვებში ვაქცინაციის პროცესი ნებაყოფლობითი იქნება. გერმანიის ჯანდაცვის მინისტრის, იენს შპანის რეკომენდაციით ბავშვების ვაქცინაცია მხოლოდ ექიმების, ბავშვების და მშობლების ინტენსიური კონსულტაციის შემდეგ უნდა განხორციელდეს.

ცნობისთვის, 28 მაისამდე Pfizer/BioNTech-ის გამოყენების ავტორიზაცია 16 წლის ზემოთ ასაკობრივ ჯგუფებში იყო გაცემული. დღეისათვის, Pfizer/BioNTech ერთადერთი ვაქცინაა, რომლის გამოყენება 12-15 წლის ასაკობრივ ჯგუფებში არის დაშვებული (კანადასა და აშშ-ში უკვე მიმდინარეობს ბავშვების ვაქცინაცია, შესაბამისი ნებართვა გაიცა ბრიტანეთის მარეგულირებლის მიერაც). ბავშვების ვაქცინირება მხოლოდ მას შემდეგ დაიწყო, რაც ბავშვებში ჩატარებულმა კვლევებმა ვაქცინების უსაფრთხოება და ეფექტურობა დაადასტურა.

-----------------------------------------------------------------------

სტატია Facebook-ის ფაქტების გადამოწმების პროგრამის ფარგლებში მომზადდა. ვერდიქტიდან გამომდინარე, Facebook-მა შესაძლოა სხვადასხვა შეზღუდვა აამოქმედოს - შესაბამისი ინფორმაცია იხილეთ ამ ბმულზე. მასალის შესწორებისა და ვერდიქტის გასაჩივრების შესახებ ინფორმაცია იხილეთ ამ ბმულზე.