დეზინფორმაცია: ვაქცინის ორი დოზა ორ წელიწადში ადამიანს კლავს

ვედიქტი: ყალბი ამბავი

17 ივლისს Facebook-ჯგუფში ლევან ვასაძის მხარდამჭერები levan vasadze Facebook-მომხმარებელმა tvm.ge-ის დეზინფორმაციული სტატია გამოაქვეყნა. სტატიის სათაურის თანახმად, ვაქცინის ორი დოზა ორ წელიწადში ადამიანს კლავს, ამას კი არავინ გვიმხელს. 

გარდა იმისა, რომ მოცემული მასალა ანტივაქსერულ შინაარს ატარებს, ის ასევე,ვაქცინებთან და ვაქცინაციის პროცესთან დაკავშირებით, დაუდასტურებელ მტკიცებებს შეიცავს. 

მტკიცება, თითქოს ვაქცინის ორი დოზა ორ წელიწადში ადამიანს კლავს და ამას არ გვიმხელენ, უსაფუძვლოა და ვაქცინაციის პროცესის მიზანმიმართულ დისკრედიტაციას ემსახურება. აღსანიშნავია, რომ ვაქცინის მოწინააღმდეგეები ათეული წლებია, არსებობენ და მასთან დაკავშირებული დეზინფორმაციები მორიგი ვირუსის გამოჩენისთანავე ხელახლა ვრცელდება. კორონავირუსის პანდემიის დაწყებიდან დღემდე აქტიურად ვრცელდება კონსპირაცია, თითქოს პანდემია კარგად დაგეგმილი აფიორაა, რომლის მიზანიც ვაქცინების საშუალებით მოსახლეობის შემცირებაა. 

კოვიდვაქცინები, რომლებიც მთელ მსოფლიოში, მათ შორის - საქართველოშიც, გამოიყენება (ფაიზერი, ასტრაზენეკა, სინოფარმი), მსოფლიო ჯანდაცვის ორგანიზაციის და მაღალი სანდოობის მქონე მარეგულირებლების მიერ არის დამტკიცებული და გადაუდებელი მოხმარების ავტორიზაცია აქვს მინიჭებული. ავტორიზებული ვაქცინა ნიშნავს, რომ მან პრეკლინიკური და კლინიკური კვლევის ყველა ფაზა წარმატებით გაიარა. მართალია, COVID-19-ის ვაქცინები ექსტრემალური პირობებიდან გამომდინარე, შემჭიდროვებულ ვადებში შეიქმნა და დამტკიცდა, თუმცა კვლევის არცერთი საფეხური, რომლითაც ვაქცინების ეფექტურობა და უსაფრთხოება დგინდება, გამოტოვებული არ ყოფილა.

სინამდვილეში, ექსპერიმენტული მხოლოდ კვლევის პრეკლინიკური ფაზაა, რა დროსაც   ვაქცინების გამოცდა ცხოველებზე ხორციელდება და ის კონკრეტული ანტიგენი განისაზღვრება, რომელიც იმუნური რეაქციის გამოსაწვევად არის საჭირო. 

პრეკლინიკური ფაზის შემდგომი ეტაპი კლინიკური კვლევებია, რაც თავის მხრივ, სამი ფაზისაგან შედგება და სამივე ფაზის დროს ვაქცინის გამოცდა მოხალისეობრივი გზით შერჩეულ ცდის პირებზე ხდება. 

კოვიდვაქცინებმა კვლევის ყველა საფეხური წარმატებით გაიარეს, რის საფუძველზეც ჯანმრთელობის მსოფლიო ორგანიზაციისა და მაღალი სანდოობის მქონე მარეგულირებლების (EMA, FDA) მიერ, ავტორიზაცია მიენიჭათ. თუმცა ვაქცინის გამოყენებაში ჩაშვებისთანავე, ვაქცინის უსაფრთხოებაში დასარწმუნებლად, მუდმივი მონიტორინგის წარმოებაა საჭირო. სწორედ ამ მიზნით არსებობს VAERS-ის (Vaccine Adverse Event Reporting System) სისტემა, სადაც ვაქცინებთან დაკავშირებული გვერდითი მოვლენების შემთხვევების აღრიცხვა ხდება.  

აქედან გამომდინარე, მტკიცება, რომ ვაქცინები ადამიანს 2 წელიწადში კლავს, სიმართლეს არ შეესაბამება. მოცემული დეზინფორმაცია, კონსპირაციული და ყალბი მტკიცებების გამოყენებით, მოსახლეობაში ანტივაქსერული განწყობების გაღვივებას ისახავს მიზნად.

----------------------------------------------------------------------------------------------------------------

სტატია Facebook-ის ფაქტების გადამოწმების პროგრამის ფარგლებში მომზადდა. ვერდიქტიდან გამომდინარე, Facebook-მა შესაძლოა სხვადასხვა შეზღუდვა აამოქმედოს - შესაბამისი ინფორმაცია იხილეთ ამ ბმულზე. მასალის შესწორებისა და ვერდიქტის გასაჩივრების შესახებ ინფორმაცია იხილეთ ამ ბმულზე.