დეზინფორმაცია: ზურა ბაკურაძე ვაქცინის გართულების შედეგად გარდაიცვალა

ვერდიქტი: ყალბი ამბავი

სოციალურ ქსელში გავრცელდა დეზინფორმაცია, თითქოს ანსამბლ „ქართული ხმების“ სოლისტი ზურაბ ბაკურაძე კორონავირუსის საწინააღმდეგო ვაქცინის გართულებების შედეგად გარდაიცვალა. რეალურად, აღნიშნული ინფორმაცია სიმართლეს არ შეესაბამება და ყალბი ამბავია.

აღსანიშნავია, რომ სოციალურ ქსელში მომხმარებელი „ფანტინა“, ზურა ბაკურაძის პირადი პროფილიდან აღებულ ფოტოს იყენებს, რომელზეც გამოსახულია წარწერა „მე ავიცერი“. სავარაუდოდ, Facebook-მომხმარებელი ამ ფოტოს გამიზნულად იყენებს იმ ფონის შესაქმნელად, თითქოს ბაკურაძე ვაქცინაციასთან დაკავშირებული გართულებების შედეგად გარდაიცვალა.

სინამდვილეში, მომღერალი უბედურ შემთხვევას ემსხვერპლა. უბედური შემთხვევა 23 ივნისს, რაჭაში მოხდა. სოფელ შქმერში გზა ჩავარდა, რა დროსაც ზურა ბაკურაძე ხევში გადავარდა. საგანგებო სიტუაციების მართვის სამსახურის ინფორმაციით, სამაშველო ჯგუფს მამაკაცი მრავლობითი დაზიანებებით დახვდა და მისი გადარჩენა ვერ მოხერხდა.

ამდენად, მომღერლის გარდაცვალებას კორონავირუსის საწინააღმდეგო ვაქცინაციასთან არავითარი კავშირი არ აქვს.

---------------------------------------------------------------------------------------------------------

სტატია Facebook-ის ფაქტების გადამოწმების პროგრამის ფარგლებში მომზადდა. ვერდიქტიდან გამომდინარე, Facebook-მა შესაძლოა სხვადასხვა შეზღუდვა აამოქმედოს - შესაბამისი ინფორმაცია იხილეთ ამ ბმულზე. მასალის შესწორებისა და ვერდიქტის გასაჩივრების შესახებ ინფორმაცია იხილეთ ამ ბმულზე.