სოციალურ ქსელში სხვადასხვა Facebook- მომხმარებლის, ჯგუფისა თუ გვერდის მიერ 15 წლის მოზარდის შესახებ იდენტური შინაარსის ისტორია ვრცელდება (ბმული 1, ბმული 2, ბმული 3, ბმული 4, ბმული 5, ბმული 6, ბმული 7). ტექსტის მიხედვით, ბიჭი პურის ქურდობისთვის დააპატიმრეს და როგორც შემდეგ სასამართლოზე აღმოჩნდა, მას პური ავადმყოფი დედისთვის მიჰქონდა. მოსამართლემ ბიჭი გაათავისუფლა და დანაშაულის პასუხისმგებლობა მთლიანად საზოგადოებას დააკისრა. კონკრეტული ისტორია ძირითადად სასამართლოში გადაღებული ერთი და იგივე ფოტოს თანხმლებით ვრცელდება. რეალურად, სოციალურ ქსელში გავრცელებული ისტორია სიმართლეს არ შეესაბამება და ყალბი ამბავია.

რეალურად, პოსტებზე თანდართულ ფოტოში მამის მკვლელობაში ბრალდებული 14 წლის ზაქარი ნიგლია გამოსახული და არა პურის ქურდობისთვის დაკავებული 15 წლის ბიჭი. 

ზაქარი ნიგლის ფოტო 2009 წლის 20 მაისს, აიდაჰოს კადველის სასამართლო დარბაზში არის გადაღებული, როდესაც ის მამის მკვლელობისთვის გაასამართლეს. Idaho Press-ის მიერ გამოქვეყნებული სტატიის მიხედვით, ზაქარი ნიგლმა მამის იარაღით მკვლელობა აღიარა. ნიგლის თქმით, მამამისი მასზე წლების განმავლობაში ფსიქოლოგიურ და სექსუალურ ძალადობას ახორცილებდა და აპირებდა, რომ მის უმცროს და-ძმასაც მსგავსად მოპყრობოდა. ზაქარი სასამართლომ საბოლოოდ დამნაშავედ სცნო და 7 წლით თავისუფლების აღკვეთა შეუფარდა, თუმცა ის ხუთი წლის შემდეგ 2014 წელს გაათავისუფლეს. 

ზაქარი ნიგლის ფოტო სხვა ქვეყნებშიც გავრცელდა, თუმცა სხვა ისტორიის თანახმად მან შვეიცარიის ბანკი გატეხა და მამის ანგარიშზე 75 მილიარდი დოლარი გადარიცხა. ეს ისტორია ფაქტების გადამმოწმებელი პლატფორმების (PesaCheck და Africa Check) მიერ აგრეთვე შეფასდა როგორც ყალბი ამბავი. 

რაც შეეხება თავად 15 წლის ბიჭის მიერ პურის მოპარვის ისტორიას, აღსანიშნავია, რომ ის სოციალურ ქსელში აქამდეც არაერთხელ გავრცელებულა, თუმცა სხვა ბიჭების ფოტოებით, მაგრამ ამ შემთხვევებშიც ბიჭების რეალური ისტორიები პურის მოპარვის ისტორიებისგან განსხვავდებოდა.

მაგალითად, პირველ ფოტოზე გამოსახულ 12 წლის კრისტიან ხუან ფერნანდესს ბრალი უმცროსი ძმის სასიკვდილოდ ცემაში ედებოდა, ხოლო მეორე შემთხვევაში 17 წლის მეთიუ მორგანს ბრალი სახლში ცეცხლის გაჩენისთვის წაუყენეს, რომელსაც მისი ერთი წლის ძმის სიცოცხლე ემსხვერპლა. 

--------------------------------------------------------------------------------------------------------------------------

სტატია Facebook-ის ფაქტების გადამოწმების პროგრამის ფარგლებში მომზადდა. ვერდიქტიდან გამომდინარე, Facebook-მა შესაძლოა სხვადასხვა შეზღუდვა აამოქმედოს - შესაბამისი ინფორმაცია იხილეთ ამ ბმულზე. მასალის შესწორებისა და ვერდიქტის გასაჩივრების შესახებ ინფორმაცია იხილეთ ამ ბმულზე.