სოციალურ ქსელში გვერდებმა „ლიდერი 41“ და „Newsagency.ge“ პოსტად ლევან ბერძენიშვილის ფოტო გამოაქვეყნეს, რომელზეც დატანილია წარწერა „ილია იყო მოთამაშე, ლოთი და მოძალადე ადამიანი. მის ნაწარმოებებს არანაირი ღირებულება არ გააჩნია“. პოსტები მომხმარებელს უჩენს შთაბეჭდილებას, რომ ლევან ბერძენიშვილმა ილია ჭავჭავაძე უარყოფითად მოიხსენია. რეალურად, ლევან ბერძენიშვილს ილია ჭავჭავაძის მისამართით აღნიშნული სიტყვები არ უთქვამს და ციტატა გამოგონილია. უფრო მეტიც, ის გადაცემაში „წიგნები“, ილია ჭავჭავაძეს დიდებულ პიროვნებად და ერის მამად მოიხსენიებს. 

სავარაუდოდ, სოციალურ ქსელში გავრცელებული ყალბი ციტატა ბერძენიშვილის 2 წლის წინანდელ ვიდეოგადაცემიდან „წიგნები“ - ერთ-ერთი მონაკვეთის დამახინჯებულ ვერსიას წარმოადგენს. გადაცემაში ბერძენიშვილი ილია ჭავჭავაძეზე საუბრისას აღნიშნავს, რომ, ერთი მხრივ, ის როგორც წმინდანი შესაძლებელია ვინმემ ვერ წარმოიდგინოს, რომ ის იყო „აბსოლუტურად ცოცხალი ადამიანი, ბანქოს მოთამაშე, ძალიან სერიოზული აზარტის მქონე კაცი, კარგი თამადა და მოქეიფე, უაღრესად მორალური, ამავე დროს უაღრესად ევროპული“. 

ამასთან, ბერძენიშვილი გადაცემის დასაწყისშივე ილია ჭავჭავაძეს შესანიშნავი ფიგურას უწოდებს, რომელიც საქართველოს მეფეების, პრეზიდენტების, პრემიერ-მინისტრების „გვერდით და მათ ზემოთ“ უნდა განიხილებოდეს - „ილია არის მწერალიც, საზოგადო მოღვაწე და ქართველი ხალხის მამა, ... რომელმაც როდესაც იყო ღრმა ეროვნული პესიმიზმი, დანერგა იდეა ეროვნული აღორძინების და გადაარჩინა საქართველო და ქართველი ხალხი დავიწყებას, ისტორიაში ჩაკარგვას და აღადგინა ის ხალხი, რომელსაც არ ჰქონდა სახელმწიფო“. 

------------------------------------------------------------------------------------------------------------------------------

სტატია Facebook-ის ფაქტების გადამოწმების პროგრამის ფარგლებში მომზადდა. ვერდიქტიდან გამომდინარე, Facebook-მა შესაძლოა სხვადასხვა შეზღუდვა აამოქმედოს - შესაბამისი ინფორმაცია იხილეთ ამ ბმულზე. მასალის შესწორებისა და ვერდიქტის გასაჩივრების შესახებ ინფორმაცია იხილეთ ამ ბმულზე.