სოციალურ ქსელში ვრცელდება მტკიცება, რომლის თანახმად, ჰავაიზე ხანძრით დაზარალებულ მოსახლეობასთან შეხვედრისას აშშ-ის პრეზიდენტ, ჯო ბაიდენს, ჩაეძინა. მტკიცებულების სახით წარმოდგენილია ვიდეო, სადაც, დეზინფორმაციის გამავრცელებლების თქმით, ჩანს, როგორ თვლემს აშშ-ის პრეზიდენტი შეხვედრის დროს.

სინამდვილეში, აღნიშნული მტკიცება ყალბია  და ეს ორიგინალი ვიდეოთი დასტურდება.

უფრო მაღალი ხარისხის სრული ვიდეოს ნახვისას ჩანს, რომ თავის დახრის შემდეგ ბაიდენს არ ჩასძინებია. ABC News-ის ჰონოლულუს ფილიალის KITV-ის მიერ გავრცელებულ ვიდეოში, სადაც ეს მომენტი 5:13 წუთზე იწყება, ჩანს, როგორ ხრის ბაიდენი თავს. კადრის მოახლოების შემთხვევაში ნათელია, რომ ბაიდენი თვალებს ახამხამებს. შემდეგ კი ჩანს, რომ თავის დახრით პრეზიდენტი ბაიდენი ერთ-ერთ გამომსვლელს ეთანხმება, რომელიც ამბობს: „ჩვენ ვართ საზოგადოება, რომელიც ოჯახზე, ოჰანაზე დგას“ (ოჰანა ჰავაიურად ოჯახს ნიშნავს). 

იმის გამო, რომ ეს ფრაგმენტი სოციალურ ქსელში ვირუსულად გავრცელდა, მტკიცებას თეთრი სახლის პრეს-მდივნის მოადგილე ენდრიუ ბეიტსი გამოეხმაურა. მან ერთ-ერთი კონგრესმენის ტვიტი გადააზიარა, რომელშიც ეწერა: „წარმოიდგინეთ, შეერთებული შტატების პრეზიდენტი იძინებს, როდესაც თქვენ ბოლო 100 წლის განმავლობაში ყველაზე მომაკვდინებელი ხანძრის შედეგებს აღწერთ. ეს აბსოლუტურად ამაზრზენია. ბაიდენმა თანამდებობა დაუყოვნებლივ უნდა დატოვოს“.

ბეიტსმა უპასუხა: „ნამდვილად უნდა „წარმოიდგინოთ“, რადგან ეს რეალურად არ მომხდარა. „აბსოლუტურად ამაზრზენი“ არის ის, თუ რამდენად ადვილია თქვენთვის ამომრჩევლის მოტყუება“.

ამგვარად, მტკიცება, თითქოს ჰავაის მოსახლეობასთან შეხვედრის დროს ჯო ბაიდენს დაეძინა, ყალბია.

-------- 

სტატია Facebook-ის ფაქტების გადამოწმების პროგრამის ფარგლებში მომზადდა. ვერდიქტიდან გამომდინარე, Facebook-მა შესაძლოა სხვადასხვა შეზღუდვა აამოქმედოს - შესაბამისი ინფორმაცია იხილეთ ამ ბმულზე. მასალის შესწორებისა და ვერდიქტის გასაჩივრების შესახებ ინფორმაცია იხილეთ ამ ბმულზე.