სოციალურ ქსელში Facebook-ანგარიში 𝙂𝙪𝙡𝙡𝙛 𝙂𝙚𝙤𝙧𝙜𝙞𝙞𝙖_𝙁𝙖𝙣'𝙨 კომპანია „გალფის“ სახელით დეზინფორმაციას ავრცელებს. პოსტში, რომელსაც თან რამდენიმე ფოტო ახლავს, ვკითხულობთ, რომ „გალფის“ დაბადების დღის აღსანიშნავად მომხმარებლებს სხვადასხვა საჩუქარს გადასცემენ, როგორებიცაა: „სასაჩუქრე ჩანთები, ფული, მანქანები, მოტოციკლები და სავაჭრო კუპონები“. პოსტი სოციალურ ქსელში ვირუსულად გავრცელდა, მას 11 ათასზე მეტი კომენტარი და 26 ათასზე მეტი გაზიარება აქვს.  

სინამდვილეში, აღნიშნული პოსტი კომპანია „გალფს“ არ ეკუთვნის, გათამაშების შესახებ ინფორმაცია ყალბია და სავარაუდოდ, მორიგ თაღლითურ სქემას წარმოადგენს. ამაში პოსტის აღწერაც გვარწმუნებს, სადაც აღნიშნავენ, რომ გამარჯვებულებს შეტყობინების საშუალებით დაუკავშირდებიან. შემთხვევას კომპანია „გალფის“ Facebook-ის ოფიციალური გვერდიც გამოეხმაურა, სადაც აღნიშნავენ, რომ ეს თაღლითური სქემაა, რომლის მიზანი ხალხის მოტყუება და ფულის გამოძალვაა.

საინტერესოა გამოქვეყნებული თაღლითური პოსტის რამდენიმე დეტალი, რაც მის არასანდოობაზე მეტყველებს. პირველ რიგში, გვერდის სახელი, რომელიც რამდენიმე ბეჭდურ შეცდომას შეიცავს, მაგალითად Gulf-ის ნაცვლად წერია Gullf”, ხოლო „Georgia”-ს ნაცვლად - „Georgiia”. გარდა ამისა, საგულისხმოა, რომ აღნიშნული გვერდი 2023 წლის 1-ელ ოქტომბერს შეიქმნა და 3600-ზე მეტი გამომწერი ჰყავს, სავარაუდოდ, სწორედ ამ თაღლითური სქემის გასავრცელებლად. 

ამავდროულად, მსგავსი დეზინფორმაცია სოციალურ ქსელში Facebook-ანგარიშის 𝙎𝙖𝙢𝙨𝙪𝙣𝙜 𝙁𝙖𝙣𝙨-ის მიერ კომპანია „სამსუნგის“ სახელითაც გავრცელდა. პოსტში ვკითხულობთ, რომ „სამსუნგის“ დაბადების დღის აღსანიშნავად კომენტარების ავტორები სმარტფონებით დასაჩუქრდებიან. 

პოსტი სოციალურ ქსელში ვირუსულად გავრცელდა, მას 100-ზე მეტი კომენტარი და  400-ზე მეტი გაზიარება აქვს. რამდენიმე კომენტარის მიხედვით, მომხმარებლებს შეტყობინება ეგზავნებათ, რითაც დარეგისტრირებას სთხოვენ, რაც სავარაუდოდ, პირადი ინფორმაციის მოპოვებას ისახავს მიზნად. კომპანია „სამსუნგის“ ოფიციალურ გვერდზე მსგავსი ინფორმაცია არ იძებნება.

ამგვარად, კომპანიების „გალფისა“ და „სამსუნგის“ სახელით გავრცელებული ინფორმაცია რეალობას არ შეესაბამება. პოსტები თაღლითური სქემის ნაწილია და სავარაუდოდ, Facebook-მომხმარებლების პირადი ინფორმაციისა თუ საკრედიტო ბარათის მონაცემების მოპოვებას ისახავს მიზნად. აღსანიშნავია, რომ როგორც „გალფს“, ასევე „სამსუნგს“ ოფიციალური Facebook-გვერდები აქვთ, რომლებიც ვერიფიკაციის ნიშნითაა მონიშნული. ყველა სანდო ინფორმაცია, სიახლე თუ გათამაშება მხოლოდ მათ გვერდებზე ქვეყნდება. 

------------------- 

სტატია Facebook-ის ფაქტების გადამოწმების პროგრამის ფარგლებში მომზადდა. ვერდიქტიდან გამომდინარე, Facebook-მა შესაძლოა სხვადასხვა შეზღუდვა აამოქმედოს - შესაბამისი ინფორმაცია იხილეთ ამ ბმულზე. მასალის შესწორებისა და ვერდიქტის გასაჩივრების შესახებ ინფორმაცია იხილეთ ამ ბმულზე.