სოციალურ ქსელში ვირუსულად გავრცელდა ვიდეო, (1; 2; 3; 4; 5; 6) რომლის მიხედვითაც უკრაინის ერთ-ერთი ტელევიზიის ეთერში შობის წინა დღეს ვიდეოკლიპი გავიდა, რომელზეც სატანის ფორმაში გადაცმული ადამიანები მღერიან და რუსებს სიკვდილს უსურვებენ. Facebook-გვერდი „შიინ ევროპისკენ“ ვიდეოს შემდეგი აღწერით ავრცელებს: „UkroTV-ზე შობის წინა დღეს გავიდა ვიდეო, სადაც სატანის სახით გადაცმული უკრაინელი შემსრულებლები ცეკვავდნენ ეკლესიაში და სიკვდილს ლოცულობდნენ რუსებისთვის. აგინებენ „თითოეულ ოჯახს დაავადებებს, უბედურ შემთხვევას... მოსკოვში‼️“. ვიდეო ასევე გაავრცელა ბლოგერმა ბექა ვარდოსანიძემ.
თუ ვიდეოს კარგად დავაკვირდებით, მასზე ერთ-ერთი უკრაინული ტელეკომპანიის “24 канал” ლოგოს აღმოვაჩენთ, ამასთან ვიდეოზე ჩანს დროც 11:10, გარდა ამისა, პოსტების აღწერის მიხედვით, ვიდეოკლიპი შობის წინა დღეს გავრცელდა, (შობის დღესასწაულის თარიღად 7 იანვარი იგულისხმება, შესაბამისად, ვიდეო ეთერში 6 იანვარს უნდა გასულიყო) ზოგიერთი კი ამტკიცებდა, რომ ვიდეო საახალწლო კონცერტის ნაწილი იყო.
ჩვენ გადავამოწმეთ 24-ე არხის 6 იანვრის ტელეპროგრამა და ეთერი, სადაც 11:10-სთვის ეთერში გადაცემა სახელწოდებით „რეალობა. ყველაფერი ომის შესახებ“ (Реалії. все про Війну) იყო და არა საახალწლო კონცერტი, როგორც ზოგიერთი პოსტის ავტორი ამტკიცებდა.
-ფოტოანაბეჭდი „24 канал“-ის ტელეპროგრამიდან:
-„24 канал“-ის 6 იანვრის ეთერის ფოტოანაბეჭდი:
სინამდვილეში ვიდეო რგოლი ერთ-ერთი ონლაინ კაზინოს მიერ გადაღებული სარეკლამო კლიპია, რომელსაც მსგავსი კოსტიუმებით გადაღებული სარეკლამო რგოლების მთელი სერია აქვს. ეს კონკრეტული კი საახალწლო მილოცვას წარმოადგენდა და ინტერნეტსივრცეში 1 იანვარს გავრცელდა. აღნიშნულ ვიდეორგოლს არანაირი კავშირი არ აქვს არც უკრაინის ეკლესიასთან და არც უკრაინელების ოფიციალურ საშობაო მილოცვასთან.
გარდა ამისა, უკრაინული ფაქტების გადამმოწმებელი ორგანიზაციის “StopFake” ინფორმაციის მიხედვით, უკრაინაში არსებობს კანონი რეკლამის შესახებ, რომლის მიხედვითაც ტელეკომპანიებს უფლება აქვთ ონლაინ კაზინოს რეკლამებს საეთერო დრო 23:00-06:00 შუალედში დაუთმონ, შესაბამისად, დღის 11 საათზე ვერც ეს რეკლამა გავიდოდა ეთერში.
ამგვარად, მტკიცება, რომლის მიხედვითაც სატანის ტანსაცმელში გამოწყობილმა უკრაინელებმა ზემოაღნიშნული ვიდეოკლიპი ტელეეთერში შობის წინა დღეს გაავრცელეს, ყალბია. იგი არც უკრაინელების საშობაო მილოცვასთან არაა კავშირში და არც უკრაინის ეკლესიასთან.
-----------------------------------
სტატია Facebook-ის ფაქტების გადამოწმების პროგრამის ფარგლებში მომზადდა. ვერდიქტიდან გამომდინარე, Facebook-მა შესაძლოა სხვადასხვა შეზღუდვა აამოქმედოს - შესაბამისი ინფორმაცია იხილეთ ამ ბმულზე. მასალის შესწორებისა და ვერდიქტის გასაჩივრების შესახებ ინფორმაცია იხილეთ ამ ბმულზე.
