სოციალურ ქსელში Facebook-ანგარიში ფოტოანაბეჭდს ავრცელებს, რომლის მტკიცებითაც უკრაინის ეროვნული უსაფრთხოებისა და თავდაცვის საბჭოს ხელმძღვანელი ალექსეი დანილოვი აღიარებს, რომ რუსეთში 22 მარტს მომხდარი ტერაქტის უკან უკრაინა დგას (არქივირებული ბმული).

სინამდვილეში, ვიდეო რეალური არ არის და ე.წ Deepfake-ს წარმოადგენს.

ვიდეო რუსულმა პროპაგანდისტულმა მედიამაც გაავრცელა, კერძოდ, Московский Комсомолец-მა და Lenta.ru-მ. დანილოვის Deepfake ვიდეო რუსული პროპაგანდისტული არხის НТВ-ს ეთერშიც გავიდა. აგრეთვე, ტელეკომპანია Звезда-ს ტელეგრამ არხზე აღნიშნული ვიდეორგოლი გამოაქვეყნა, თუმცა მალევე ახალ პოსტში აღიარა, რომ შესაძლოა ვიდეო რეალური არ იყოს.  

დანილოვს მსგავსი განცხადება არ გაუკეთებია. ინფორმაციას გამოეხმაურა უკრაინის დეზინფორმაციის წინააღმდეგ ბრძოლის ცენტრი. მათ განაცხადეს, რომ ვიდეო ყალბია. კადრები 2024 წლის 16 მარტის ახალი ამბების გადაცემიდან არის აღებული, რომელშიც, რეალურად, უკრაინის დაზვერვის სახელმწიფო სამსახურის ხელმძღვანელი კირილო ბუდანოვი სხვადასხვა თემაზე, მათ შორის, რუსეთის არჩევნებზე, საუბრობდა. გაყალბებულ ვიდეოში ბუდანოვი დანილოვის Deepfake-ითაა ჩანაცვლებული. 

BBC verify-ის ჟურნალისტმა შაიან სარდარიზადემაც დაადასტურა, რომ ვიდეო ე.წ Deepfake-ს წარმოადგენს.

ამგვარად, ალექსეი დანილოვის ვიდეო რეალური არ არის და ის ე.წ Deepfake-ს წარმოადგენს.

ცნობისთვის, 2024 წლის 22 მარტს, მოსკოვში „Crocus city hall”-ში ტერაქტი მოხდა. 25 მარტის მონაცემებით, დაღუპულთა რიცხვი 137-ია, ხოლო დაშავებულია 180-ზე მეტი ადამიანი. ტერაქტზე პასუხისმგებლობა ტერორისტულმა დაჯგუფება „ისლამურმა სახელმწიფომ“ აიღო.

----------------------- 

სტატია Facebook-ის ფაქტების გადამოწმების პროგრამის ფარგლებში მომზადდა. ვერდიქტიდან გამომდინარე, Facebook-მა შესაძლოა სხვადასხვა შეზღუდვა აამოქმედოს - შესაბამისი ინფორმაცია იხილეთ ამ ბმულზე. მასალის შესწორებისა და ვერდიქტის გასაჩივრების შესახებ ინფორმაცია იხილეთ ამ ბმულზე.