სოციალურ ქსელში Facebook-ანგარიში „ტერენტი გლდანელი“, რომლის გავრცელებული დეზინფორმაცია „ფაქტ-მეტრს“ აქამდეც არაერთხელ გადაუმოწმებია (ბმული 1, 2, 3), ლაზარე გრიგორიადისის ფოტოს აქვეყნებს, წარწერით: „ჩემ ბერძენ ძმებს წინასწარ ვულოცავ ევროპაზე გავლას, საბერძნეთის ნაკრები დინამოზე ცეცხლს დაანთებს!“. მისი მტკიცებით, ლაზარე ევროპის ჩემპიონატის საკვალიფიკაციო ეტაპის ფლეი-ოფის ფინალურ მატჩზე საბერძნეთის ნაკრებს გულშემატკივრობს. ფოტო იდენტური წარწერით TikTok-ზეც გავრცელდა (1, 2). რეალურად, ლაზარე გრიგორიადისს მსგავსი განცხადება არ გაუკეთებია.

გადამოწმების შემდეგ გაირკვა, რომ მსგავსი ციტატა არც ერთ საძიებო სისტემაში, სანდო მედიასაშუალებების ვებგვერდზე არ იძებნება. აღნიშნული განცხადება არც ინტერნეტსივრცეში, ლაზარე გრიგორიადისის დედის, მამისა და ადვოკატის ოფიციალურ Facebook-გვერდებზე, არ გავრცელებულა.

წყაროს შესახებ:

ინტერნეტსივრცეში „ტერენტი გლდანელი“-ს სახელით Facebook-გვერდი და პირადი ანგარიში გვხვდება, რომლებიც მსგავსი შინაარსის განცხადებებს ხშირად აზიარებენ. Disinfoobserver-ის თანახმად, გვერდი „ერთიანი ნაციონალური მოძრაობის“ და მათთან აფილირებული პირების წინააღმდეგ მოქმედებს. გვერდზე სხვა ოპოზიციური პოლიტიკური პარტიების საწინააღმდეგო პოსტებიც ქვეყნდება. ამავდროულად, ჰომოფობიურ, სექსისტურ და სიძულვილი ენის შემცველ გზავნილებსაც ავრცელებს. ანგარიში მადისკრედიტირებელ ფოტო-ვიდეო მანიპულაციებს ხშირად იყენებს. გვერდი საქართველოდან იმართება.

ამგვარად, მტკიცება, რომლის თანახმადაც ლაზარე გრიგორიადისი საბერძნეთის ნაკრებს გულშემატკივრობს და მას გამარჯვება წინასწარ მიულოცა, არ დასტურდება.

--------------------------------------------------------------------------

სტატია Facebook-ის ფაქტების გადამოწმების პროგრამის ფარგლებში მომზადდა. ვერდიქტიდან გამომდინარე, Facebook-მა შესაძლოა სხვადასხვა შეზღუდვა აამოქმედოს - შესაბამისი ინფორმაცია იხილეთ ამ ბმულზე. მასალის შესწორებისა და ვერდიქტის გასაჩივრების შესახებ ინფორმაცია იხილეთ ამ ბმულზე.