როგორც ვიცით, სემეკის გადაწყვეტილებით, 2021 წლის 1 იანვრიდან ელექტროენერგიის ტარიფი -  როგორც საყოფაცხოვრებო, ასევე არასაყოფაცხოვრებო მომხმარებლებისთვის, გაიზარდა. ტარიფი ზრდა როგორც თბილისში, ასევე რეგიონებშიც განხორციელდა.

„თელმიკოს“ შემთხვევაში (თბილისში), იმ აბონენტებისთვის, ვინც თვეში 101 კვტ.სთ-ს ელექტროენერგიას მოიხმარს, ელექტროენერგიის ტარიფი დღგ-ს ჩათვლით 14.544 თეთრიდან 18.041 თეთრამდე გაიზარდა, 101-301 კვტ.სთ მომხმარებლისთვის - 18.556 თეთრიდან 22.053-თეთრამდე, 301 კვტ.სთ-ზე მეტი ელექტროენერგიის მოხმარებისთვის ტარიფი 23.040 თეთრიდან 26.537 თეთრამდე გაიზარდა. ზრდამ თითოეულ შემთხვევაში 3.5 თეთრი შეადგინა. 

ცხრილი1. „თელმიკოს“ საყოფაცხოვრებო მომხმარებლების ტარიფები, თეთრი/კვტ.სთ (დღგ-ს ჩათვლით)

წყარო: სემეკი

რაც შეეხება „თელმიკოს“ არასაყოფაცხოვრებო მომხმარებლებს, მათთვის ტარიფი კვტ.სთ ელექტროენერგიაზე 11 თეთრზე მეტით გაიზარდა. 

„ენერგო-პრო ჯორჯიას“ შემთხვევაში (რეგიონებში), 101 კვტ.სთ-მდე მომხმარებლისთვის ელექტროენერგიის ტარიფი დღგ-ს ჩათვლით  14.237 თეთრიდან 17.731 თეთრამდე გაიზარდა, 101-301 კვტ.სთ-ს შემთხვევაში - 18.213 თეთრიდან 21.707 თეთრამდე, 301 კვტ.სთ-ზე მეტი ელექტროენერგიის მოხმარების შემთხვევაში კი 22.733 თეთრიდან 26.227 თეთრამდე გაიზარდა.  „ენერგო-პროს“ შემთხვევაში, თითოეული ტიპის აბონენტისთვის ზრდამ 3.494 თეთრი შეადგინა. ამასთან, კომპანიის არასაყოფაცხოვრებო მომხმარებლებს ელექტროენერგიის ტარიფი 1კვტ.სთ-ზე 10.8 თეთრიდან 14.6 თეთრამდე გაეზარდათ.

ცხრილი 2: „ენერგო-პრო ჯორჯიას“ საყოფაცხოვრებო მომხმარებლების ტარიფები, თეთრი/კვტ.სთ (დღგ-ს ჩათვლით)

წყარო: სემეკი

როგორც აღვნიშნეთ, ელექტროენერგიის ტარიფი წინა წელს, 2021 წლის 1 იანვარს გაიზარდა. თუმცა მთავრობამ მაშინ გაზრდილი ტარიფის სუბსიდირების გადაწყვეტილება მიიღო და მოქმედ ტარიფსა და გაზრდილ ტარიფს შორის სხვაობა - 300 კვტ.სთ-მდე ელექტროენერგიის მომხმარებელი აბონენტებისთვის, თავად დაფარა. შესაბამისად, გასულ წელს მოსახლეობის უმეტეს ნაწილს ელექტროენერგიის ტარიფის ზრდა არ შეეხო.

გარდა საყოფაცხოვრებო მომხმარებლებისა, გასულ წელს მთავრობამ ელექტროენერგიის გაზრდილი ტარიფის 50% იმ ადგილობრივ კომპანიებსაც დაუსუბსიდირა, რომელნიც საკვებ პროდუქტებს აწარმოებდნენ.

მიმდინარე წელს ელექტროენერგიის ტარიფის სუბსიდირების პროგრამა აღარ გრძელდება. შესაბამისად, თბილისში და რეგიონებშიც საყოფაცხოვრებო მომხმარებლების უმრავლესობა (301 კვტ.სთ-მდე მომხმარებლები) 1 კვტ.სთ ელექტროენერგიაში 3.5 თეთრით მეტს გადაიხდის. რაც შეეხება 301 კვტ.სთ-ზე მეტი ელექტროენერგიის მომხმარებლებს, მათ ელექტროენერგიის გადასახადი - ამავე ოდენობით, შარშანვე გაეზარდათ. აქედან გამომდინარე, ელექტროენერგიის გადასახადი ყველა კატეგორიის მომხმარებლისთვის გაძვირდა, განსხვავება მხოლოდ ის არის, რომ ელექტროენერგიის გადასახადი მომხმარებლების ნაწილს შარშან, დიდ უმრავლესობას კი მიმდინარე წლიდან გაეზარდა.